旭日故事︰浩國與翰民

浩國與翰民是一對朋友，翰民最近被人毆打入院，昏迷不醒整整三天，終於回復知覺，浩國當然到醫院去探望，見到翰民稍有精神，便關心他的情況，兩人便交談起來…

＊＊＊＊＊＊

國︰“民，點解你會無啦啦畀人打到入院既？明明當日你好地地參加遊行，之前重好興奮架，我點勸你都係要去，嗱，結果出事啦！點解會咁既？”

民︰“其實我醒返之後一直晌度諗，不過諗極都諗唔起，所以索性唔諗喇…係呢，今日九一八喇喎，出面尐市民點呀？有冇繼續同我地一齊抗爭呀？”

國︰“咪又係咁，亂七八糟咁，見到尐嘢就破壞，唉，翰民，你到呢個時候依然諗住搞事？”

民：“枉你個名叫做阿國呀！（然後用普通話腔說出）人家小日本踏到我們的頭上，你居然還說出這種事兒來，媽的，真的不愛國！”

國︰“點樣先係愛國，走出去打爛晒自己人既嘢就係愛國咩？又唔見你打爛屋企自己既嘢？你阿媽話你前兩日攞咗幾隻西鐵城同精工錶返去畀屋企人，重一人一隻添，明明係日本牌子，你愛國又要買？”

民︰“咪傻啦！我唔係買，我係為左破壞日本經濟，所以去日式百貨搶返來！等佢賺唔到我地國民既錢！”

國︰“吓？有冇搞錯呀？搶？你唔係抵制日貨咩？明明你哋打爛晒尐日本車架！”

民︰“部車太大部，搶唔到啫！搶唔到我咪打爛佢囉！鬼叫佢地係日本牌子咩？！”

國︰“咁你知唔知入面有人架？好危險架！而且你哋打爛既，好多都唔係日本車，而係中國車！”

民︰“唓！我哋設計既車款成日抄外國款，尐樣咁鬼似，有時打錯咗都在所難免架！你哋應該諒解！”

國︰“好！咁拉麵店呢？只不過掛幾個日文字，老闆又係中國人，你哋又打又破壞，又點解？”

民︰“你唔知喇！佢地平時尐拉麵又貴，湯底又用地溝油來整！尐炸雞又有蘇丹紅一號，尐鰻魚又有孔雀石綠！我哋想打呢尐奸商漢奸好耐囉！”

國︰“喂喂，你頭先講咩地溝油、蘇丹紅、孔雀石綠通通都係我國食品特產喎！”

民︰“我唔理！最衰都係日本仔！”

國︰“日本仔咁衰，你又睇AV？重儲晒蒼井空既Ａ片添”

民︰“我就係唔買正版碟，睇晒老翻，破壞佢經濟嘛！何況，蒼井空是中國的！”

國︰“吓？咁你唔好講吉澤明步同松島楓都係中國人？”

民︰“挑，我晌精神上已經強姦咗佢地，佢地依家算係半個中國人喇！”

國︰“頂！你都痴線，你用來睇AV既DVD機咪又係日本牌子！你唔好話你用咗就會變成中國機呀！”

民︰“你唔講尤是可，講開就把幾火，我本身以為大減價買咗部SONY，妖，點知買返來拆開先發現原來係買咗SQNY喎！睇返個盒，又真係Q而唔係O呀！我咪即時返去同佢理論囉，點知佢話“貨物出門恕不退換，何況還有159蚊就買到部SONY呀，咪傻啦…”

國︰“咁又係，全國咁多山寨！但係你反SONY都唔反山寨，我想問，邊個真係呃緊我哋既錢？”

民︰“絕對係日本嘢！你都唔愛國既！要再教育一下！”

國︰“愛國係咁樣教出來既咩？你用既晶片、技術等等，都來自日本架，係咪全部都破壞？連你之前昏迷救治用既儀器，都係日本仔做！你頭先醒返飲既益力多呀，都係日本牌子啦！破壞就可以成功咩？不如要自己富強！”

民︰“我哋富強過佢啦！我地食嘢不知高明過佢幾多，佢哋仍然似生番一樣，食生嘢…”（然後想入非非）

國︰“你明明都好鍾意食魚生架？”

民︰“………”

國︰“民？…民？喂！畀尐反應喎，係唔係邊度痛呀？又唔舒服？使唔使叫姑娘醫生呀？”

民︰“我，我終於記得點解畀人打喇…”

國︰“吓？記得返咪好囉，點解呢？”

民︰“當日我同班同志遊行緊，尿急喎，見附近間壽司舖度門畀人打爛晒，咪入去借廁所用囉，點知咁啱我個客又打來，接收又唔好喎，我咪係咁重覆一句︰喂…余生，余生，余生？越叫越大聲…”

國︰“跟住呢？”

民︰“跟住有一班講普通話口音，應該係遊行中排後尐既人，一衝衝入來，就係咁打我，我畀佢哋打到訓晌度，然後又畀人踢呀…咁囉”

國︰“有冇搞錯？你唔表露你係反日份子既身份咩？”

民︰“佢哋係咁拳打腳踢，我根本連講都講唔到嘢…我淨係聽到尐普通話“媽的，居然叫什麼魚生魚生…別以為我們說普通話就不知道你說啥，你媽的SB，最討厭你們廣東人說什麼廣東話，還叫那小日本食的魚生，打死你…”然後，我感覺我條頸鍊、波鞋都畀人搶咗…”

國︰“唔係嘛？你對鞋明明係中國牌子！佢哋唔係淨反日貨咩？”

民︰“唉…算啦，我理解既，佢地都係愛國啫！開微博睇下先…咦，呢個轉自澳門朋友小曦FACEBOOK既連結，主角咁似打我個人既？”

國︰“係？”

＊＊＊＊＊＊

兩人用翻牆軟件看YOUTUBE，看到這段片子，一個香港記者問一個操普通話的遊行人士，那人面容變幻十足，然後說︰“如果是我們中國人自己開的日本店，我們在不明情況的條件下去咂，那是我們有一些不對的地方，但是即便是不對，也是可以理解的，對不對？”

對不起，我真的不能理解…　

BY 小曦