◎所謂台語文

　　　　　　　　　　　　　　　　　　⊕潘文良

　　阿文也𣍐記得，位啥麼時陣開始，文章都攏儘量用台語去寫。
　　有一寡人，大概是「求好心切」，標準較懸，所以‥誠愛掠包，兼愛揬臭、愛拍銃，三不五時，著來「批評指教」一番——
　　伊講‥「你寫的，呣是台語文！」
　　呣知「台語文」的定義，到底是啥麼？
　　啥麼是「台語」？
　　字詞句讀，若是用台語讀音去講，著是台語——
用客語讀音去講，著是客語；用華語讀音去講，著是華語；
用粵語讀音去講，著是粵語。
　　比如‥唐詩，若用台語去唸，著是台語唐詩——
若用客語去唸，著是客語唐詩；若用粵語去唸，著是粵語唐詩；
若用華語去唸，著是華語唐詩。
　　又比如‥新聞，若用台語去報導，著是台語新聞——
若用客語去報導，著是客語新聞；若用粵語去報導，著是粵語新聞；
若用華語去報導，著是華語新聞。
　　所以‥文章，若用台語去唸，著是台語文章——
若用客語去唸，著是客語文章；若用粵語去唸，著是粵語文章；
若用華語去唸，著是華語文章。
　　「你寫的，呣是台語文！」
　　有可能是因為‥有的字詞句讀，伊𣍐曉台語音，要安怎讀，只好用華語去讀；無法度通篇用台語去讀，所以則會感覺‥人寫的，呣是台語文。
　
　　有一個台語新聞的主播，看著新聞稿上，一寡翻譯的語詞——
比如「吉普賽」，台語呣知要怎講，所以雄雄𢵰唸做‥
〔ㄐㄧㆵ　ㄅㄨ└　ㄙㄞˋ〕[tsit8~4 pu5~3 sai2]（一抔屎）。
看著「薩爾瓦多」，台語呣知要怎講，所以雄雄𢵰唸做‥
〔ㄒㄧㆩ　ㄇㄧ　ㄨㆩ　ㄍㄜ〕[siann2~1 mih4~1 uann2~1 kor1]（啥麼碗糕）。
看著「阿諾史瓦辛格」，台語呣知要怎講，所以雄雄𢵰唸做‥
〔ㄚ　ㄉㄜ├　ㄒㄧˋ　ㄧㄚ└　ㄒㄧㄥˋ　ㄍㄝㆷ〕[a2~1 tor1~7 si2 ia7~3 sing3~2 keh4]（啊都死也性格）。
　　其實，台語人，生活當中，開講的時陣，也無一定攏講台語，嘛是會台語、華語，摻濫咧做陣講——客語人，往往也會曉講台語，所以，往往會客語、台語、華語，摻濫咧做陣講。
　　所以‥語詞句讀，若是𣍐曉用台語去唸，著用國語去唸，其實也無啥差別——
文章是「寫」的，主要是用「看」的，所以‥看有著好！
　　阿文的台語文章，也攏儘量加以註解，予𣍐曉台語的人，會當知影意思。
　　華語所謂‥「外行看熱鬧、內行看門道。」
　　對台語有興趣的人，著會當多加研究、學習。
　
　　也有一寡台語人，真有「分別心」，誠愛講‥
「你用的，呣是台語詞，而是華語詞（北語詞）。」
　　比如‥繁雜，呣是台語詞；除夕，呣是台語詞；汗水，呣是台語詞；
電燈，呣是台語詞……
　　阿文著講‥「漢文字，所組成的語詞，絕大部分，攏是『漢文語系，共同資產』，要用呣用、要安怎用，實在據在人用。」
　　所謂「台語」，乃是位「閩南語、古漢語」，所演進來的——
是有若濟語詞，是「純正的台語」？是佇台灣一片土地上，所創製的？
比如「紅毛塗（水泥）、荷蘭豆（豌豆）」，著是純正的台語詞——
因為‥這是佇台灣，所產生、創製出來的語詞。
　　著算呣是台語詞，敢講著𣍐使用？
這也華語詞——𣍐使用；遐也華語詞——𣍐使用……
一篇文章，是要怎寫、是要怎寫會好？
　　漢文語詞，絕大部分，攏是「共產」，何必「畫地自限」？
比如‥兄弟繼承土地，攏有使用權，若是你家己呣用，也不准兄弟去用，實在是無情理。
　　漢文語系，共同資產的語詞，若要分類，會當分做‥文言詞、口語詞，而非分做‥華語詞、台語詞、客語詞……
　　比如‥布袋戲的對白——
　　　　甲‥「告辭！」
　　　　乙‥「奉送啟程！」
　　　　甲‥「不用！」
　　　　乙‥「該然！」
　　這著是「文言詞」，若是用「口語詞」，著是‥
　　　　甲‥「來走！」
　　　　乙‥「我送你！」
　　　　甲‥「呣免啦！」
　　　　乙‥「應該的啦！」
　　寫文章，文言、口語的運用，是愛看要寫啥麼性質的文章，是議論文，抑是記述文，或者是小說，去做調配、運用——
呣是寫台語文，著一定愛用「口語詞」去寫，則會當號做「台語文」。
　　
　　也有人講‥「你寫的，呣是台語的文法……」
　　呵呵！台語文法，啥麼是台語文法？呣知有人，會當寫一篇啊論文，看啥麼是真正的「台語文法」——佮華語、客語、粵語文法，到底有啥無仝？
　　一篇古文、一首唐詩宋詩，台語人看有、客語人看有、粵語人看有、華語人看有……可見，只要是「漢文語系」的文章，所謂的「文法」，其實絕大部分，攏是𫝛款的。
　　要講「文法」，實在也太「專業」囉！
不如講‥「你寫的，呣是台語的講法！」
按爾，人較好理解。
　　台語、華語（乃至佮客語、粵語），有的講法，是無共款的！比如‥
　　　　華語‥地震。　　台語講‥地動。
　　　　華語‥說故事。　台語講‥講故事、講古。
　　　　華語‥拔蘿蔔。　台語講‥薅菜頭。
　　　　華語‥放風箏。　台語講‥放風吹。
　　　　華語‥盪鞦韆。　台語講‥㧡韆鞦、㧡栱鞦。
　　　　華語‥不要臉。　台語講‥𣍐見笑。
　　一篇文章，是呣是「台語文」，大概愛看伊用的「台語的講法」，到底有偌濟？若是一篇文章𨲮𨲮長，煞只有三兩句話，是台語的講法，實在也𣍐當算是「台語文」。
　
　　其它，親像「台灣俗語、孽恝話」的運用——
比如「一舉兩得」，會當用台灣俗語‥「一兼二顧，摸蜊仔兼洗褲。」
一句話，要安怎去表達，會較好聽、較藝術，較會當予人理解、接受。
但這是屬於「修辭學」，佮寫啥麼文（華語文、台語文、客語文），
實在也無必然的關係。
　　其實，寫文章，主要是表達家己的知見——
要安怎寫，著安怎寫；人要安怎看，著隨在人去看。
　　
　　也有人寫「台語文」，真愛「漢羅混雜」，
　　本人是認為‥
所謂台語，自古著是以「漢字」為載體；
要寫文，著儘量用漢字去寫，文章則會有一致、協調之美。
　　簡單舉一個例‥
　　　　　◎靜夜思　⊕唐。李白
　　　　床前明月光，
　　　　疑是地上霜。
　　　　舉頭望明月，
　　　　低頭思故鄉。
通篇攏用漢字，按爾看起來，著真順眼，但如果是‥
　　　　　◎Tsenn7-ia7 思 　⊕Tng5。李白
　　　　Sng5-tsing5 明月　kong1,
　　　　疑是 ti7 上霜。
　　　　Ki2-thior5 望 Bing5-guat8,
　　　　低頭思 Koo3-hiong1.
如是漢羅混雜，看著都真𣍐順眼，實在破壞「美感」，難以「悅讀」（閱讀）。
　　如是「漢羅混雜」，著若親像，國小一年仔的小朋友共款，因為抑𣍐啥會曉寫漢字，所以，每每用注音去寫，比如，要送一張母親節的卡片，會寫‥
　　　　ㄇㄚ　˙ㄇㄚ　！　ㄨㄛˇ　ㄞˋ　ㄋㄧㄣˊ　！
　　啊若國小二年的，雖然較會曉寫漢字，但因為寫漢字，較僫寫，有時陣，嘛會漢字、注音混雜‥
　　　　媽媽　ㄗㄨㄟˋ　ㄨㄟˇ　大！　媽媽！　我　ㄞˋ　您！
　　若是國小五年、六年，文章抑佫是「漢字注音混雜寫」——
老師若無給伊拍箍仔，邊仔寫漢字，遐都真奇怪嘍！
　　台語，雖然有一寡語詞，難以𢭻著正確的用字，但著算是用「替用字」，也總比「漢羅混雜」較好——呣管用啥字詞，只要加以註解，使人會當了解意思著好！
　　
　　阿文至今，也呣知寫了幾篇「台語文」（貧惰去算）——
呣知是呣是‥「前世人，牽牛去踏破人祖先的黃金甕仔」？
煞有人看𣍐慣勢，呣知是呣，食飽𪝋閑，無載誌做，
定定愛給人「潑冷水、搝後骹」，伊則會歡喜。
　　人講‥「未生囝，呣好笑人的囝臭頭。」
　　若是感覺，別人寫的台語文，無及格，家己較𠢕，何妨家己去寫幾篇，予人鼻芳一下——指導一下仔時人、後進，看到底台語文，是要安怎寫，則算合格？
若是乾仔會曉出一支喙，歸工佇𨑜，剾剾洗洗（批評東、批評西），
實在對台語、台語的發展，一點仔幫助嘛無！
　　　　　　　　　　　　　　　　　　2018.08.14.二　12:00:00　初稿
■附註
　　電燈呣是台語詞。
　　伊講‥「電腦是台語詞；電燈是北語詞，台語愛講電火。」
　　電腦怎會是台語詞？　電腦呰個詞，敢是台語人，所創製的？
「電腦」佮「硬碟、軟碟、鍵盤、滑鼠、隨身碟」等等，攏是「同掛的」！
如果「硬碟、軟碟、鍵盤、滑鼠、隨身碟」等等，攏是華語詞，
那麼‥電腦，怎會是台語詞？只不過是用台語去講，嘛真順喙而已！
乾仔會當講‥「電腦，是台灣人（而非台語人），所創製的名詞。」
（大陸早年，是用「電算機」（電子計算機），
　根據名詞委審定漢英計算機名詞（第二版，2002年），為‥
　　　　個人計算機　personal computer, PC
 因為‥電腦是比計算機的功能較濟、較強，
 所以，大陸如今，也𨓚咧用「電腦」囉！）
既然，電腦呰個名稱，台語人，都會當用；電燈，怎會著𣍐當用？
電燈，呣是台語詞？
《甘字典、台日大詞典》，攏有收「電燈」呢！
只是電燈，佇台灣，較無人講而已！
若比較「電燈、電火」，實在是「電燈」，較合物件的稱呼——
古早用油燈有火、用蠟燭有火，即馬的電球仔、日光燈，哪有「火」咧？
　
■台語註解
【𣍐記得】ㆠㄝ└　ㄍㄧ└　ㄉㄧㆵ(漳)∥ㆠㄨㄝ└　ㄍㄧ└　ㄉㄧㆵ(泉)　
　　　　　be7~3 ki3 tit4(漳)∥bue7~3 ki3 tit4(泉)
　不記得。
【時陣】ㄒㄧ├　ㄗㄨㄣ├　si5~7 tsun7　時候。
【一寡人】ㄐㄧㆵ　ㄍㄨㄚ　ㄌㄤˊ　tsit8~4 kua2~1 lang5　一些人。
【掠包】ㄌㄧㄚ└　ㄅㄠ　liah8~3 pau1
　找錯，揭發、揭穿。抓到把柄、小辮子。
【揬臭】ㄊㄨˋ　ㄘㄠ└　thuh4~2 tshau3
　①揭人短處、錯誤。　②鄙視、誣衊，使人受傷害。
【拍銃】ㄆㄚˋ　ㄑㄧㄥ└　phah4~2 tshing3
　①打槍、開槍。
　②槍斃。
　③引申、轉用為‥故意找碴、斥責、拆台，而使人難堪、受挫。
【放炮】ㄅㄤˋ　ㄆㄠ└　pang3~2 phau3
　①放鞭炮。發射炮彈，或點燃火藥使之爆炸。
　②打麻將時，出牌讓人胡牌。
　③比喻發表驚人議論，或猛烈批評。
【句讀】ㄍㄨˋ　ㄉㄠ├　ku3~2 tau7　句子。
　指文章休止、停頓處。文中語意完足，稱為「句」；
　語意未完，而可稍停頓的，稱為「讀」。
　古文書面上，用圈和點來標記。
　
【開講】ㄎㄞ├　ㄍㄤˋ　khai1~7 kang2　聊天。
【據在】ㄍㄧˋ　ㄗㄞ├(漳)∥ㄍㄨˋ　ㄗㄞ├(泉)
　　　　ki3~2 tsai7(漳)∥ku3~2 tsai7(泉)
　任憑、任由。不受拘束，隨意而為。
【會當】ㄝ└　ㄉㄤ˙∥ㄝ└　ㄉㄤˋ　e7~3 tang2~0∥e7~3 tang2
　能夠、可以。
【𣍐使】ㆠㄝ└　ㄙㄞˋ(漳)∥ㆠㄨㄝ└　ㄙㄞˋ(泉)
　　　　be7~3 sai2(漳)∥bue7~3 sai2(泉)
　不能、不可、不行。
【𣍐當】ㆠㄝ└　ㄉㄤ└(漳)∥ㆠㄨㄝ└　ㄉㄤ└(泉)
　　　　be7~3 tang3(漳)∥bue7~3 tang3(泉)
　不當、不能、不可；不能夠、行不通。
【這遐】ㄗㄝ　ㄏㄝ　tse1　he1　這、那。　暫以「遐」替代。
　楊青矗《國臺雙語辭典》，創製｛辶＠系｝字，專字專用。
【無仝】ㆠㄜ├　ㄍㄤ├　bor5~7 kang7　不同、有差異。
【𫝛款】ㄒㄧㄤ└　ㄎㄨㄢˋ　siang5~3 khuan2
　相同、一樣、同樣。　𫝛，台創漢字。「相同」連音造字。
【偌濟】❷ㆣㄨㄚ└　ㄗㄝ├(漳)∥ㆣㄨㄚ└　ㄗㄨㄝ├(泉)
　　　　gua7~3 tse7(漳)∥gua7~3 tsue7(泉)
　疑問詞。多少。
【𨲮𨲮長】ㄌㄜˋ　ㄌㄜˋ　ㄉㆭˊ　lor3~2 lor3~2 tng5
　甚長貌。　例：一條路，𨲮𨲮長。
【孽恝話】ㆣㄧㄚㆵ　ㄎㄧㄚ　ㄨㄝ├　giat8~4 khiat4~8 ue7
　俏皮、戲謔的話，如歇後語。
【黃金甕仔】ㄏㄨㄥ├　ㄍㄧㆬ├　ㄤ　ㄚˋ
　　　　　　hong8~7 kim1~7 ang2~1 a2
　骨罈。　又稱‥金斗甕仔。或做封金甕仔。
【𨓚咧】①ㄉㄨㄝˋ　ㄌㄝ(漳)∥ㄉㄝˋ　ㄌㄝ(泉)
　　　　②ㄉㄨㄝ└　ㄌㄝ˙(漳)∥ㄉㄝ└　ㄌㄝ˙(泉)
　　　　①tue3~2 le1(漳)∥te3~2 le1(泉)
　　　　②tue3 le1~0(漳)∥te3 le1~0(泉)　跟著、隨著。
　𨓚，台創漢字。　教育部《臺閩典》，借用「綴」字。
【歸工】ㄍㄨㄧ├　ㄍㄤ　kui1~7 kang1　終日、整天。
【佇𨑜】ㄉㄧ└　ㄏㄧㄚ　ti7~3 hia1　在那。　𨑜，台創漢字。
【定定】ㄉㄧㆩ└　ㄉㄧㆩ├　tiann7~3 tiann7　常常。
【剾洗】ㄎㄠ├　ㄙㄝˋ(漳)∥ㄎㄠ├　ㄙㄨㄝˋ(泉)
　　　　khau1~7 se2(漳)∥khau1~7 sue2(泉)
　挖苦、譏諷、嘲弄。
【剾剾洗洗】ㄎㄠ├　ㄎㄠ├　ㄙㄝ　ㄙㄝˋ
　　　　　　khau1~7 khau1~7 se2~1 se2
　挖苦、譏諷、嘲弄。
【鼻芳】ㄆㆪ└　ㄆㄤ　phinn7~3 phang1
　①聞香。　②予人鼻芳‥比喻有所作為，好讓人知道，是香是臭。
【乾仔】ㄍㄢ├　ㄚ　kan1~7 a1　僅、只。
　因為受「ㄢ、ㄚ」的影響，而有‥
　〔ㄍㄢ├　ㄋㄚ├　kan1~7 na7〕之音變，寫做「乾若、乾但」。
　或者〔ㄍㄢ├　ㄉㄚ　kan1~7 ta1〕，寫做「乾燋」。
　教育部《臺閩典》做「干焦」，干為乾之簡體，焦是臭火焦的焦。
　燋通焦，用「燋」字，可別其意，為燥（甚乾為燥）之意。
　燋，台創漢字「𪸼」｛火周｝。
【貧惰】ㄅㄧㄣ├　ㄉㄨㆩ├　pin5~7 tuann7　懶惰。或作貧憚。
【家己】ㄍㄚ├　ㄍㄧ├　ka1~7 ki7　自己、本身。
　
【煞】{文}ㄙㄚㆵ　sat4　{變}ㄙㄚ　sat4~8
 　　　{白}ㄙㄨㄚㆷ　suah4　{變}ㄙㄨㄚˋ　suah4~2
 　　　{本}ㄙㄨㄚ└　sua3　{變}ㄙㄨㄚˋ　sua3~2
 　　　{替}ㄙㆩㆷ　sannh4　{變}ㄙㆩˋ　sannh4~2
 　①兇神。　②為兇神所傷。　③怎麼、哪有。表反詰語氣。
【懸】{白}ㄍㄨㆮˊ(厦)　kuainn5　{變}ㄍㄨㆮ├　kuainn5~7
　　　{白}ㄍㄨㄢˊ(漳)　kuan5　{變}ㄍㄨㄢ├　kuan5~7
　　　{白}ㄍㄨㆪˊ(泉)　kuinn5　{變}ㄍㄨㆪ└　kuinn5~3　高。
【𢭻】{本}ㄘㄨㄝ├(漳)　tshue7　{變}ㄘㄨㄝ└　tshue7~3
　　　{本}ㄘㄝ├(泉)　tshe7　{變}ㄘㄝ└　tshe7~3
　尋找。台用漢字。　教育部《臺閩典》，借「揣」字。
　𢭻，從手，吹聲。形聲會意。構字‥手、口、欠。
　欠物件、物件無去，用手𢭻；若𢭻路，著開喙去問。
【給】{本}ㄍㄚ'ㆷ　kah8　ㄍㄚ└　kah8~3
　〈介詞〉給。用來加強語氣。例：你給我會記得！
　教育部《臺閩典》用「共」〔ㄍㄚ〕[ka1]。
　給人〔ㄍㄚ└　ㄌㄤ˙　kah8~3 lang0〕　給人、將人。
【𢵰】{本}ㄍㄚ'ㆷ　kah8　{變}ㄍㄚ└　kah8~3
　　①將、把。　②為、替、幫。　※台用漢字。例：
　　⑴𢵰物件予人。（把東西給人。）
　　⑵𢵰我的肩胛頭掠掠咧。（幫我把肩膀抓一抓。）
【僫】{文}ㆦㆶ　ook4 {變}ㆦ'ㆶ　ook4~8
　　　{白}ㄜㆷ　orh4 {變}ㄜˋ　orh4~2
　　　{白}ㄜ'ㆷ　rh8 {變}ㄜ└　orh8~3
　①困難、不容易。　②慢。
【𪝋】{本}ㄒㄧㆫ　siunn1　{變}ㄒㄧㆫ├　siunn1~7
　太、甚。　※台創漢字。
　教育部《臺閩典》用「傷」字，容易發生歧義，使人誤解、曲解
　比如「傷重」，是「受傷很重」，還是「太重」？
【要】{俗}ㆠㄝㆷ(漳)　beh4　{變}ㆠㄝˋ　beh4~2
　　　{俗}ㆠㄨㄝㆷ(泉)　bueh4　{變}ㆠㄨㄝˋ　bueh4~2
　要、需要；索取、討取。
　※台創漢字｛要卜｝，電腦尚無，故以「要」暫用。
　　教育部《臺閩典》借「欲」字。
　　「欲」義為「心思意想」——心動而無行動，無「要」之「索取、討取」。
　　既是借字，乾脆直接用「要」字訓讀，至少意思明確，不用再蹧蹋「欲」字。
【｛要卜｝】{本}ㆠㄝㆷ(漳) beh4 {變}ㆠㄝˋ beh4~2
　　　　{本}ㆠㄨㄝㆷ(泉) bueh4 {變}ㆠㄨㄝˋ bueh4~2
　　　　{本}ㆠㄝˋ(漳)　be2　{變}ㆠㄝ　be2~1
　　　　{本}ㆠㄨㄝˋ(泉)　bue2　{變}ㆠㄨㄝ　bue2~1
　要、索求、索取。※台創漢字。
【𣍐】{本}ㆠㄝ├　(漳)　be7　{變}ㆠㄝ└　be7~3
　　　{本}ㆠㄨㄝ├　(泉)　bue7　{變}ㆠㄨㄝ└　bue7~3
　　　{本}ㆠㄨㄝㆷ(泉)　bueh4　{變}ㆠㄨㄝˋ　bueh4~2
　不會、不能。 　※台創漢字，「勿會」連音。
【𠢕】{白}ㆣㄠˊ　gau5　{變}ㆣㄠ├　gau7　{泉變}ㆣㄠ└　gau3
　能幹、有本事、很擅長、專於某事。
　《說文》𠢕：健也。《廣韻》：俊健。《集韻》：强也。
　
【一兼二顧，摸蜊仔兼洗褲。】比喻一舉兩得。
 　ㄧ'ㆵ　ㄍㄧㆰ　ㆢㄧ└　ㄍㆦ└　，
 　ㆠㄨㄥ├　ㄌㄚ├　ㄚˋ　ㄍㄧㆰ├　ㄙㄝ　ㄎㆦ└　。
 　t4~8 kiam1 ji7~3 koo3 ，
  bong1~7 la5~7 a2 kiam1~7 se2~1 khoo3 。
 　
 ※本文首發於「新聞臺」。2018.08.14.二　12:46:48
 ◎潘文良《所謂台語文》。2018.08.14.二　12:00:00
 　http://mypaper.pchome.com.tw/avun01/post/1376073468
 ※本文分享於「臺語學院」。2018.08.14.二　12:54:00
 　https://www.facebook.com/groups/978821105480673/permalink/2255622907800480/
 ※本文 分享於「臺灣話資料交流所」。2018.08.14.二　12:56:00
 　https://www.facebook.com/groups/434167333333483/permalink/1873479099402292/
 ■標籤：台語、台語文、台語詞、台語文法、台語講法